Chai aur Yaadein

Aaj phir tum mujhe yaad aaye,
Tumhari hasi,
Wo haathon mein haath lena,
Wo kandhon pe haath rakhna,
Wo sab yaad aaya aaj!

Tumhara wo daantna,

Naraaz hona, 

Hanskar fir se gale lagana,

Wo sab yaad aaya aaj!

Baadalon ka garajna,

Baarish ho rahi hai, aao chai piye, kehkar bulana,
Tapri par geele hokar garam chai peena,

Aaj phir tum mujhe yaad aaye!

Mausam badle, rituen badli,

Tum nahi badle,

Wahi muskurahat wahi chai,
wahi tapri aur Tum!!

Lockdown Diaries: Kuchh band kisse

Din jaise jaise nikale,

Waise ek bandi hone ka ehsaas hua

Chaaron taraf band khidkiyaan, 

sunsaan raaste

Hawayein chal rahi thi, patte bhi gire pedon se,

Maidaano mein char rahe kuch jaanwar,

Chidiyan chehek rahe the,

Motor gaadiyon ki shor mein ghul gaye the,

Aaj sabhi jeev zinda ho gaye, 

Band darwaaze halke se khule,

Kuchh chehre kabhi jhankte huye bahar

Kahin ankhon mein aas thi, kuch mein bebasi,

Kuchh mein khushiyan bhi thi shaamil,

Khushiyan jaise garmi ki chuttiyan aa gayi

Ghar mein khel kood, FM par gaane bajana,

TV par Mahabharat aur Ramayan ka laut aana,

Wahi chutkule, wahi kehkahe, wahi masti ki leher 

Bachpan ke din laut aaye!